उतावळा नवरा

 उतावळा नवरा 

हा किस्सा मी खेड पंचायत  समिती येथे कार्यरत असतानाचा आहे. त्यावेळी माझा एक मित्र  प्रत्येक सुट्टी च्या दिवशी माझी टु व्हीलर घेऊन त्याच्या मैत्रिणीला घेऊन फिरायला जायचा. मला तिच्या बाबतीत फारशी माहिती नव्हती.आणि तशी काही गरज सुध्दा नव्हती. 

एक दिवस सकाळीच मला माझा मुंबईला नोकरी करत असलेला एक मित्र आँफिसमध्ये भेटायला आला.रामदास एक आनंदाची बातमी आहे. पहिल्यांदा ती तुलाच सांगायची आहे म्हणून सकाळी सकाळी तुझ्याकडे आलोय.

बोल काय आनंदाची बातमी आहे? मी म्हणालो.

काल मी अमुक गावाला लग्नासाठी मुलगी पहायला गेलो होतो. एक नंबर… जबरदस्तच आहे पोरगी. डोळ्यापुढुन तिचा चेहरा जाता जात नाही. येत्या मंगळवारी ठरवूनच टाकायचे आहे.असे म्हणत पाकिटातून त्याने आयकार्ड साईज रंगीत फोटो मला पहायला दिला.

आनंदाची गोष्ट आहे फक्त गडबड करु नकोस. जरा दमाने घे..मी म्हणालो. 

गडबड करु नकोस काय म्हणतोस? उलट मी तर म्हणतोय येत्या मंगळवारी साखरपुडा उरकुनच टाकायचा.मित्र म्हणाला.

केव्हा एकदा लग्न होतय असे मला झाले आहे. तु सुट्टी काढ आपण सर्व नियोजन या आठवड्यात करून टाकू. 

त्याच गावचा माझा एक मित्र आहे त्याच्याकडून काही माहिती मिळाते का ते पाहू.मी त्याला म्हणालो.

काही माहिती घ्यायची गरज नाही आमच्या जुन्या पाहुण्यां पैकीच आहे गेलं वर्ष दिड वर्ष तिचे वडील लग्नासाठी माझ्या वडिलांच्या मागे लागले आहेत. मित्र म्हणाला.

पाच दहा मिनिटे अशाच इकडच्या तिकडच्या गप्पा झाल्या. मुलीचा फोटो माझ्या हतातच होता.आणि तेवढ्यात माझा तो दुसरा मित्र आला जो माझी टु व्हिलर न्यायचा.

मी त्याला माझ्या टेबलाजवळ बोलवून घेतले आणि फोटो त्याच्या समोर धरून विचारले.या मुलीला ओळखतोस? 

त्याने खिसे चापचायला सुरुवात केली.आणि मला म्हणाला. कधी खिशातून पडला कोणास ठाऊक ? दे की रामदास प्लिज..

मला घटनेचा पुर्ण अंदाज आला होता मी त्याला गप्प बसवायचा प्रयत्न करत होतो आणि तो पुढेच बोलत होता.

मी त्याला दरडाऊन म्हणालो उगाच काहीतरी बोलू नकोस हा फोटो तुझ्या कडील नाही आणि या मुलीचा आणि तुझा काही संबंध नाही.

अरे, काल खूप मोठा प्रॉब्लेम झाला. मी तिची वाट पहात थांबलो होतो पण ती आलीच नाही खुप उशीराने तिच्या चुलत बहीणीने येऊन मला सांगितले की तिला पहायला तमुक गावचे पाहुणे आले आहेत. सगळा पचका झाला ना राव माझा. नाही तर काल आम्ही पुर्ण नियोजन केले होते.( हे सांगत सांगत त्याने पाकीटातून त्या मुलीचा फोटो काढला) माझा तर माझ्याकडे आहे मग हा कुठला?

 हा..हा...आठवले गेल्या महिन्यात माझ्याकडील फोटो हरवला होता तो तुला सापडला असेल..हो.ना.? अशीच काही मिनिटे चर्चा चालली.

तिच्या सोबत लग्न करायला उत्सुक असलेला मित्र काय समजायचे ते समजून गेला. आणी काही न बोलता तिथून निघून गेला.

यालाच म्हणतात " उतावळा नवरा.आणि गुडघ्याला बाशिंग...